ភ្នំពេញ: លោក ខៀវ សំផន ដែលមានវ័យ ៩០ ឆ្នាំត្រូវបានផ្តន្ទាទោសជាប់ពន្ធនាគារអស់មួយជីវិតពីបទប្រល័យពូជសាសន៍និងឧក្រិដ្ឋកម្មប្រឆាំងមនុស្សជាតិ បន្ទាប់ពីសវនាការរយៈពេល ៤ ថ្ងៃត្រូវបានបិទបញ្ចប់នៅរសៀលថ្ងៃព្រហស្បតិ៍នេះនៅក្នុងអង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា។
លោក ខៀវ សំផន បានបដិសេធយ៉ាងដាច់អហង្ការចំពោះរាល់ការចោទប្រកាន់លើរូបលោក។ នៅចំពោះមុខព្រះរាជអាជ្ញាអន្តរជាតិនៅថ្ងៃ ព្រហស្បតិ៍នេះលោក ខៀវ សំផន បាននិយាយថាលោកគ្រាន់តែការពារប្រជាជនកម្ពុជាពីកងទ័ពឈ្លានពានវៀតណាមប៉ុណ្ណោះ។ លោកបានអះអាងទៀតថា លោកមិនបានដឹងអ្វីទាំងអស់អំពីឧក្រិដ្ឋកម្មរបស់ប៉ុលពត។
លោក ខៀវ សំផន បាននិយាយថា “ខ្ញុំសូមប្រកាសថាខ្ញុំមិនអាចទទួលយកការចោទប្រកាន់ដែលថាខ្ញុំជាប់ពាក់ព័ន្ធក្នុងផែនការធ្វើឧក្រិដ្ឋកម្មប្រឆាំងជនរួមជាតិ រួមទាំងជនជាតិចាមឬជនជាតិវៀតណាម។ លោកបានបន្តថាមិនថាប្រជាជនកម្ពុជាគិតយ៉ាងណាលើរូបលោកទេ លោកគ្រាន់តែចង់ប្រាប់ទៅដល់ប្រជាពលរដ្ឋខ្មែរថា លោកមិនដែលចង់ប្រព្រឹត្តឧក្រិដ្ឋកម្មប្រឆាំងនឹងជនរួមជាតិឬប្រឆាំងអ្នកផ្សេងឡើយ”។
លោក ខៀវ សំផន បានគូសបញ្ជាក់បន្ថែមថាលោកគ្រាន់តែចង់ឱ្យព្រះរាជាណាចក្រកម្ពុជាមានឯករាជ្យនិងអធិបតេយ្យភាព។ ប៉ុន្តែព្រះរាជអាជ្ញាជាតិនិងអន្តរជាតិបាននិយាយថាលោក ខៀវ សំផន បានដើរតួយ៉ាងសំខាន់ក្នុងការធ្វើសេចក្តីសម្រេចចិត្តដោយគាត់គឺជាប្រមុខរដ្ឋក្នុងរបបខ្មែរក្រហម។
បើយោងតាមអ្នកនាំពាក្យតុលាការលោក នេត្រ ភក្ត្រា នៅចុងឆ្នាំក្រោយនេះ តុលាការនិងធ្វើការសម្រេចម្តងទៀត ក្នុងការដាក់ទោសលោក ខៀវ សំផន ក្នុងករណីលោកមានអាយុច្រើន។
លោក ខៀវ សំផន ក៏បានលើកឡើងពីបញ្ហាព្រំដែនរវាងកម្ពុជានិងវៀតណាមនៅតែបន្តមានរហូតមកដល់សព្វថ្ងៃ ខណ:ពេលដែលលោកកំពុងជាប់ពន្ធនាគារនិងមិនអាចជួយអ្វីបាន។
